Ijambo ry'umunsi: Bifata amezi kubona umukiriya ariko kumutakaza bifata isogonda rimwe - Vince Lombardi
Nyarugenge: Bamwe mu bana...

Nyarugenge: Bamwe mu bana barasaba bagenzi babo kuzirikana ingamba zo kwirinda COVID-19

Mu gihe Isi yose ihangayikishijwe n’icyorezo cya COVID-19, n’ u Rwanda rudasigaye, bamwe mu bana bo mu karere ka Nyarugenge, barasaba bagenzi babo kutigira ntibindeba, bakazirikana ingamba zo kwirinda COVID-19.

Yanditswe: Hategekimana Innocent kuwa 18 Nyakanga 2021 saa 14:52

Imibare igaragazwa n’Ikigo cy’igihugu cyita ku buzima RBC, kigaragaza ko kuva COVID-19 yagera mu Rwanda muri Werurwe 2020 kugeza ku wa 16 Nyakanga 2021, abana bari munsi y’imyaka 20 banduye COVID-19 bagera ku 7,072.
Iyi mibare y’abana banduye igaragza ko ingamba zo kwirinda COVID-19 zireba buri wese kuko ntawe udashobora kwanduza cyangwa kandura.
Bamwe mu ban abo mu karere ka Nyarugenge, bavuga ko hari bagenzi babo usanga basuzugura Covid-19 bakayifata nk’aho atari indwara ikomeye, aho usanga hari n’abari gukina ntacyo bikanga ukagira ngo bo ntabwo bashobora kwandura.
Kamikazi Aline wo mu Karere ka Nyarugenge, mu Murenge wa Gitega afite imyaka 15. Avuga ko atinya cyane Covid-19 kuko ahora yumva ububi bwayo, ariko agaterwa ubwoba na bagenzi be abona ntacyo bibabwiye.
Yagize ati: “ugasanga bamutumye kuri butike aho kwambara agapfukamunwa akagenda agafashe mu ntoki cyangwa ntakambare neza. Nanjye mbere ntabwo nabyitagaho numvaga nta bwoba inteye, ariko naje kubona abayirwaye kuri televiziyo ukuntu baba bameze ngira ubwoba. Kuva ubwo nahise ntangira kubahiriza amabwiriza yo kwirinda.’’
Mugisha Fabrice w’Imyaka 13 wo mu Murenge wa Kimisagara avuga ko Covid-19 ayizi ariko ngo gukina n’abandi bana baturanye yarabikoraga, ariko aza kubireka kubera ababyeyi bamubujije.
Yagize ati: “Mbere najyaga gukina agapira n’abandi bana kandi ntabwo twabaga twambaye agapfukamunwa, ariko ubu narabiretse ntabwo nkizerera kubera ko hari umwana bambwiye ko yayirwaye bitumwa ngira ubwoba. Ndagira inama abandi bana kutazongera kuzerera kugira ngo batazandura Coronavirusi’’

Uruhare rw’ababyeyi mu gufasha abana kwirinda COVID-19

Nyiraminani Marie Claire umubyeyi wa Aline avuga ko abana bashobora kwandura COVID-19 kuko benshi baba bagiye ahantu hatandukanye kandi batubahiriza amabwiriza yo kwirinda COVID-19.
Yagize ati: “Hari abana ubona bahagaze igikundi nta n’umwe wambaye agapfukamunwa neza, bamwe banadufashe mu ntoki, COVID-19 ntacyo ibabwiye; kandi ntibatekereze ko bayanduye bashobora kuyikongeza no mu miryango yabo. Mbona ababyeyi dukwiye kubigiramo uruhare, tukabumvisha ko bakwirinda bakarinda n’imiryango yabo, kuko kugira ngo tuzatsinde iki cyorezo birasaba kutajenjeka.”
Niyingabira Julien umukozi wa RBC ushinzwe itumanaho avuga ingamba zo kwirinda zireba abantu bose ariko ko kugira ngo abana basobanukirwe neza ubukana bwa COVID-19 ndetse n’uko bayirinda, ababyeyi bagomba kubigiramo uruhare, kuko icyo umenyereje umwana cyose agifata.
Yagize ati: “Ababyeyi babanze bahe urugero abana babo kuko hari n’abantu bakuru usanga batubahiriza amabwiriza yo kwirinda COVID-19. Bigishe abana kandi babarinde kuzerera mu baturanyi, kuko umwana ashobora kugenda akagaruka yanduriye aho yagiye.”
Niyingabira akomeza avuga ko hari ubwo umwana adashobora kumva uburemere bw’icyorezo, ariko umubyeyi akwiye kumva ko agomba kumukumira atishora mu bikorwa bituma ya kwandura akazana icyorezo mu rugo rwose akarukongeza.
Kugeza ubu imibare itangwa n’Ikigo cy’Igihugu gishinzwe ubuzima RBC igaragaza ko abantu bamaze guhitanwa n’icyorezo cya COVID-19 abari munsi y’Imyaka 20 ari 8 muri aba hakaba harimo n’umwana w’amezi 2.
Muri rusange kuva COVID-19 yagera mu Rwanda muri Werurwe 2020 kugeza ku wa 16 Nyakanga 2021, mu Rwanda abamaze kwandura icyorezo cya COVID-19 ni 52,552 muri abo cyahitanye 626. Abantu bamaze gukingirwa ni 406,004.

Tanga Igitekezo



Copyright © 2016 - 2021 AFRI-MEDIA LTD. All Rights Reserved.